SUUGAANTA KAYD MAX'D CABDALLA - Recently Updated Pages

SUUGAANTII KAYD M.CABDALLA

kayd — Thu, 24 Sep 2009 05:10:00 CDT

MAGACA GABAYGA RIIX AAD MAQASHIDE

WAXAAN QOLKAN KU URURIYEY SUUGAAN MUDDO BADAN SOO TAXNAYD OO KA HADLAYSA DAREENKAYGA LA XIDHIIDHA NOLOSHA GUUD EE SOOMAALIDA HADDAY TAHAY SIYAASAD IYO HADDAY TAHAY NOLOSHA KALE IYO DHIBAATOOYINKA INNAGA REEBAY ADDUUNKA.

igala soo xidhiid hoos:

www.suugaantakayd.com

OGEYSIIS

Anonymous — Sun, 15 Mar 2009 22:43:14 CDT

Wixii talo iyo tusaale ah waad soo gelin kartaa qolkan kaas oo ummadda Soomaaliyeed dan u ah, waxa fiican wixii aflagaaddo amma colaadi ku jirto in laga dhawro.
KMA

CARTA

kayd — Sun, 08 Mar 2009 21:57:16 CDT

There is no abstract available for this page revision.

IDIL

kayd — Sun, 08 Mar 2009 21:53:06 CDT

GABBALDAYE

kayd — Sun, 08 Mar 2009 21:50:17 CDT

DHIRBAAXO

kayd — Sun, 08 Mar 2009 21:47:31 CDT

There is no abstract available for this page revision.

QALALAASE

kayd — Sun, 08 Mar 2009 21:40:59 CDT

WAA MAANSO KU SABSAN DHIBAATOOYINKA JIRA IYO SIDA AAN SOOMAALIDU ISUGU DEYIN IN NOLOSHA FOOSHA XUN LA ISKA BEDDELO WAANA 2007.

Qalalaase joogiyo
Qiiqiyo wareerkiyo
Qaxarkaa daweeyoo
Qaabkay u socotiyo
Qisadeennu yaab lehe
Qubuuraha maxaa jira?

Kolka lays qanjaafee
Tani kala qaxaysee
Qarfe laysu jiifsado
Quudkii la waayee
Qaadiro hamaansiga
Qadoodiga ku seexdaan
Qori kii cuskanayee
Qaadi waayey laafyaha
Laga qaxo nin litee
Quban yahay dadweynii
Qunyar joogsan waayoo
Qoollaali socodkii
Qamuunyaysi daymada
Qabqablaha u soo baxa
Qaraxiyo hubsiiyee
Qaybinaaya ololkaa
Loo wada qushuucaa
Qalloocay wadaagaan
Isma qabato weeyaan.

Ma qatoobo ruuxii
Ku quraacday dhaydoo
Marka lays qalaayey
Isu qayshataayoo
Qorigiyo rasaastay
Isu qaadataayoo
Marka qawdu yeedhaa
Rag qadaynayaayoo
Qosol raaciyaanoo
Marka qoonsimaad dhaco
Quduraaba joogtoo
Qilaafaad markuu jiro
Ninba qolo ku toosyoo
Quruumii wixii jirey
Qaantii la kala galay
Kama quustii reerkii
Qaalmii la kala dhacay
Laga qaaday geeloo
Qabqab dhaafa mooyee
Nabad lagu ma qooqee
Waa maxay qasuubadu?

Qawaaniinta aadmigu
Maba qabanayaanoo
Nin qabiil ku faanoo
Ka hadlaaya qaaxad
Qabqableeya mooyee
Qunyar socod la diidyoo
Qaraxaad ku nooshayee
Miyaad qaran u dhawdahay ?
Sawdigan is kala qubay
U quturay xigaalkaa
Qoqobaha ku kala jira
Qabiilkii wax kuu yahay
Quruumii adduunyada
Qorraxdaa la marayaa
Qushi sawdigaa yidhi
Qayrkaa la beretemi?

Maxay quruxi kuu tahay ?
Ubadkaaga qaawani
Qadhqadhyada habeenkii
Qayd laguma seexdoo
Qolqol laguma dheeloo
Qashinkii la tuuriyo
Qodaxdaa mudaysoo
Qarshadaa ku jabiseen
Qoobkay wareentaye

Qosol maadigaa kara ?
Ado qalay walaalkaa
Qoyskii aqoon yahay
Qatan tahay carruurtii
Qormaday lahaayeen
Lagu qubay madaafiic
Qudhacay hadhsanayaan
Qandho ay u dheertahay
Illayn quduro yaab leh

Miyaad qiimo leedahay?
Qallashay dhirtaadii
Qod dhacaaya mooyee
Miyaa qori ku beertaan
Qararida ayaa jaray
Ma qonbobay galoolkii
Qawlkii miyuu baxay
In uu qiiqo mooyee

Maxaad ula qabweyn tahay?
Adoo qiiqa soo shiday
maantana qaxoontiya
Qormadaada soo gubay
Qarni hore wixii jirey
Qoloqolo ogsoonoo
Qaar qaar la kala yahay
Sawdigan qamaamka ah
Qarafaysanaayee
Quruumii adduunyadu
Qaxwahii inoo shubay
Halkaad qodi lahayd beer
Qarahiyo hadhuudhkii
Quudkii ka falilayd
Quwad waxaad u leedahay
Qormo xuuxa kula dega
Qabiil kula wadaagine

Dhulka qaaradaa jira
Qoloqolo markay tahay
Qoqobaynnu leenoo
Qaybteennu waa mide
Sawkaa qindhicilkii
Kugu soo qamaamee
Qarka soo jafaayee
Kugu qubay madaafiic
Hablahaaga qaysaday

Haddii aan isqalanoo
Qabiil dhaafi weydaan
Wallee qoomamaa xigi
Qormadaynnu leenahay
Qoon kale ayaa degi
Qaadanaaya taan ogey.

HORMO WADE

kayd — Sun, 08 Mar 2009 21:38:12 CDT

Waxa uu gabaygan ku saabsan yahay dhaqanka Soomaalida kuwa aan isbedelin amma aan la jaan qaadin ummadaha kale, waxaana ka mid ah noloshii miyaga ee ku dhisnayd dhaqankii hore oo hadda ay ummaddu rabto in ay dawlad ku dhisaan ayaga oo welina talada hayaan Madax dhaqameedkii miyiga ka talin jiray oo adduunku ka tegey laakiin soomalidu weli daba socoto

Habka gabay higgaaddiyo naxwaha hilinka loo xaadhay
Nin waliba halkuu maaggan yahay wuu hummaajiyiye
Horaan kuugu sheegee murtida waa ka huruddaane
Intuu haraggu nool yahay maalaa igama hooydaane
Markaan hoyga aakhiro galaa ka hadli doontaane
Kamaad helin halkaan kula mariyo hadaladaydiiye
Hog daloola haadaan la qoday hul iyo meel jeexan
Haadaaqda waataan ka digey hoosta loo galaye
Adduunyadu hayaan bay ku jiri waana la hubaaye
Halkii uun ma taagnee wakhtigu waa hadhkoo kale e
Halkaad caawa joogtaa mid kale soo higsanayaaye
Soomaalaay habeen baad tahoo maad hanbaabirine
Adaa heetinaayee nin kale hiirta kaa durugye
Nin habaas butaystaan ahoo hawd dhex yuurura e
Hawadaa la marayaa anoo hooska jiifsada e
Hakashada waxaa kuugu wacan hor u kac kuu diiday
Amma hoos innoo dhigay malaa hadiba maysaane
Balaan kuu higgaadshee mar kale hooya taladayda

Hormo wade dadkoo hal iyo mida hayb u kala sooce
Boqor haarrinaayiyo Suldaan soo hor kaca beesha
Shaydaan hunduudiyo Garaad kama hawootaane
Ninka hadhaca loo xaadhayaa waa habkii tegeye
Adduunyadu horay uga martoo waa hayaan socode
Horaa looga jiitee adaa haysta weligaaye Sawdigan
Habtii weli ku jira hore wixii joogey
Illayn waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

Habka dawlad lagu maamulaa lagu heshiiyaaye
Hurdankii sokeeyaha markay habar la yeedhayso
Odayaasha hootada la koray hadal ka dhawrayso
Iyagoo harraadkii melmeley haro biyii laacday
Oo aan hadhuudh iyo bariis hoyga lagu sheegin
Hubka laba dhacaayiyo rasaas holac ka duulaayo
Hoobiyaha ninkii soo rogaa waw habeen dhalade
Iyana waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

Dagaal huriye haybtuu noqdiyo haanka lagu sheego
Halyey buu u yahay reerka dhalay kun hagoogtaane
Haawiya hadduu gala yidhaa waa hinqanayaane
Ma hubsado hacoogii qabiil soo hoggaan baraye
Isagoo halaag iyo ku wada hawker iyo dhiillo
Hoorrigu ninkiisii u kacay waw halgamayaaye
Hareeraha waxay uga socdaan hiilla ugu deeqi
Ee ay u wada heeggan tahay waa hoggaanshaha e
Iyana waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

Hoolifloow libaax iyo shabeel soo hunduda kaynta
Bahalaha hadaafiyo kuway shiishu qarinayso
Haylaha mid kuu gala maskiyo hararka qaar jiifa
Hurgumada abeeskiyo intuu halaqu kaa laayey
Amma uu harraad dilay markuu hawd ku macaluulay
Haddii aan hareer dhigo intii hanaqa aad goysey
Amma hanaddo kaa tegey adaa hoos u gawracaye
Iyagaa hubaashii ka badan tan iyo Haabiile
Hilbahiinna cuna uumiyuhu idinku haasawye
Iyana waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

Hinqashada qaxoontiga markay kala huleelayso
Haweenkiyo carruurtii markuu hugun ka yeedhaayo
Hooyadu baroortii markay hoogay kor u yeedho
Ee ay hengelihii caddaa hayle wada qaaddo
Haad soo gableeyiyo dhurwaa hilibka uu feento
Ayaa heello wiirsiga mid kale soo halaanhaliye
Huuhuuda faankiyo markuu habacu faanaayo
Oo hebel anaa dilay mid kale ku hindiwaasaayo
Haasaawahaa laga guraa lagu habsaamaaye
Iyana waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

Hanti iyo dhaqmaad xoolihii hibo laguu siiyey
Haldhaagiyo biciidkii kuwii hawdka miranaayey
Kaymaha hadoodilan kuwii hadhaca joogjoogey
Hariiryaalihii goodirkii hoobte deeradiye
Haaruun faciisaa rogmaday heeliyaan dhalanne
Holholkii kamaad jarin midkay heertay qodaxdiiye
Hurunshaha baxaayiyo markuu holacu soo gaadhay
Dhulka haawanaayiyo dhirtaa cidi hanbaynaynin
Ma hadhsado hadhaagii baxsaday habar dugaaggiiye
Haarriye ugaadhii markay halasa jiidheene
Hunguuftiga ka oogsade markaa harag u tuurteene
Haankaa u goyseen naflii waana haayiraye
Ka huleel hayiin iyo dayiin hud iyo ceelkiiye
Iyana waa hantaaqada wakhtiga hoos innoo dhigaye
Bal inay habaar tahay maxaa looga hadhi waayey?

HAGOOGANE

kayd — Sun, 08 Mar 2009 21:33:35 CDT

GABAYGANI WAXAAN TIRIYEY 1982 MAR QABIIL LA ISKU CAAYEY RAG AY KA MID AHAAYEEN DHIRBAAXO JIN IYO QAAR KALE OO KU SAABSANAA IDOOR IYO DAAROOD, TAAS OO AAN AAD UGA XUMAADAY GIRAATII NOLOSHA SOOMAALIYEED KU NOQOTAY IN QABIIL LAYSU CAAYO.

Hawraarta weedhiyo murtida hadalka miisaaman
Amma gabay hab loo tiriyey iyo heello iyo jiifto
Sheekooyin hore loo marshoo lagu hamuumaayo
Maahmaah halkii lagu wadiyo hilinka seegeynin
Iyagoo lawada haadiyoo hugufka loo diiday
Waa hodan afkeenuye markii loo hab tirinaayo
Waa loo hamuumaa sidii halab karuurkeede
Nin waliba waxuu hibanayuu hor ugu sheegaaye
Aniga hummaag bay baxoo waan hawaawiyaye
Midhadh igu hagoognaa ayaan soo halwinayaaye
Oon hilayga jiidhsiinayaa dhawra hadalkayga
Hootada halkii aan ku wado aan humaajiyo e
Hal abuurka niman baa tirshoo hoorsna aqoonne
Oo aan hannaankeeda baran haabka maansda e
Oon hodanka suugaanta iyo garan hannaankeede
Hindisuhu rag badan buu ka riday hogobyo shaydaane

Guyaal hore halkii laga tegaa haatan loo kacaye
Hiifkii ka taagnaa gubaa loo hamaansadaye
Haarriya wixii laga yimaan haatan aragnaaye
Hadal tiro rag baa ururiyoo soo halaan halaye
Meeshaan hurmuud uga fadhiyey hagaya soomaali
Hiddihii afkiisiyo murtida hadal ku deeqsiiya
Ee aan hanuuntiisa rabay hoga tusaalaynta
Hanbaabiri halkay ugu ekeyd shicibka hooseeya
Ayuun baa qabiilkii wax hoday heello loo tumaye
Habarhabarna laysugu gaboo hiilla soo baxaye

Nacas iyo hacoo baan ogeyn tii hagoogane e
Haasaawe been laa yidhaa hadalka qaarkiiye
Haddii waar qabiil lagu hodmoo lagu hagaagaayo
Immisaa nimaan hawlo qabin hawkar lagu reebay
Hoh maxaa la baday reero ladan hagarna loo geystey
Immisaa habeedleey irmaan hawkdka la qaaday.
Hanti kale nimaan wadan maxaa laga hubroonaaday
Oo hiniftankiisii tollaay haysan kari waayey
Habarwacashadiisii maxay hurisay baaruudda
Oo Hira ninkii maali jirey hiisha lagu tuuray
Oo hayaayna laysu dhuftoo laysku hurunshoobay
Hanadadii kici lahaa haadku ku casheeyey
Hooyooyinkii dhalay in badan hiimo qubanaysey
Gengelaha maxaa loo xidhoo hoogey lagu ooyey
Hablaweynti guur beeshayoo heerinku is dhafay

Waa lama huraan guurkuyoo wuu habboon yahaye
Maxaa geesi hana qaadayoo hubiyey ruuxiisa
Habeennimo ciyaar guday markii heesta lagu qaaday
Oo aan hurdada seexanno hoyga iman waayey
Hadhimada ka caagoo in badan hawda dhalandhoolay
Goortuu hablaa wada maree hubiyey maankooda
La heshiiyeye hoobaan la mood haybad iyo joogle
Goortuu hortey waalidkii hodanna weydiistay
Ee hadhac laysugu tagee hadalku dheeraaday
Haye waannu yeelliyo halkuu hibo ka dhawraayey
Maxaa laga hor joogsaday midday hadatay laabtiisu

Jiilaal hangaabsaday dhulkoo halase duulaayo
Guuyadu haraaryotayoo hogasho taagtaagan
Oo harraadku waa ba'anyahee hoosku lagu yaaco
Oo uu hantiiluhu werwero hadawga leefaaya
Markuu hees walwaaleedda iyo hoobey ugu yeedhay
Immisaan la soo horin markii haybta lagu diiday
Oo laga harraatiyey darkii hiifna lagu eegay
Oo aan hadhuub looga darin harada ceegaagta
Ruuxay heddiisii gashaan cidina haynayne
Maxay laba ishiigtoo midkood halista uu taabtay
Uu hanaqa gooyoo dabeed lagaga hawsiiyey
Hhalaagguu dembiilahu dhigiyo hadimaduu geystey
Midaan helin warkiisoon ogeyn wuxuu hallaysiiyey
Oo aan hurgumo daadinoo hiilla ugu deeqin
Immisaa habeen dumay dadyahaw haanka lagu jiiday

Afartaas higgaadaan bartiyo hadallo waayeel dhe
Hoobaan bislaatiyo murtida hibitiqeedii dhe
Afar kalena taan hibanayiyo lama huraantii dhe

Adduun waa hadhkaa guurayiyo huguf dabaylkaade
Hadhka gala habeen weeye iyo hiirta waaberiye
Amma waa hillaacoo kaliyo huufta siigada e
Hoyashada cadceeddiyo ka daran heego kaa laliye
Marbay haawanaysaa nafluhu ka halwanaayaaye
Hayiin iyo dayiin eebbahay soo hinqinayaaye
Waa laga huleeliye ma jiro ruux ku hadhayaaye
Habeennaa la sii joogayaa waa hayaan socode
Intaan haragga loo tuurin baa loo hanweyn yahaye
Iyadoo habkaa lagu wadoo lagu habsaamaynin
Ayaa loo hirdamayaa intaa heerka nololeede
Hanti dhaqasho hawl lagu jiraa hadhiyo leylkiiye
Halkii qaasin sheegiyo la dhaaf hirarki weynaaye
Hawadaa la kala qaybsadiyo hilinadeediiye

Hammi nimaan lahayn buu wakhtigu huguf ku dhaafaaye
Malaa waynnu hurudnaa arlada haatan laga guurye
Habsan baynu joognaa malaa hadiba maysaane
Nin qabiil hawaystaan marnaba hiishan weligiiye
Hurin hurin ma sheegtaan kuwaa heerka marayaaye
Hayb lagu ma faaniyo anaa hooyo kaa mudane
Hormo kaliya baan nahay haddaan lays hagranahayne
Oo uu afkooduna hal yahay haysta diin qudha e
Maxaa kaga hadraysaan qabiil hadimo weeyaane.

RA'YIGA MARTIDA QOLKA SOO BOOQATAY

kayd — Thu, 16 Oct 2008 16:28:42 CDT

HADDII AAD FIKRAD AMA FAALLO HAYSO WAAD KU SOO QORI KARTAA HOOS HADDII AY TAHAY MID AAN AFLAGAADDO IYO MEEL KA DHAC WADAN.

WAXAAD KU SOO QORI KARTAA FIKRADHA:

www.suugaantakayd.com

SILSILADDII GOLE JACAYL

kayd — Wed, 06 Aug 2008 01:00:38 CDT

QAYBTA 1AAD:

HEESAHA KAYD CURIYEY INTA AAN HAYNO

kayd — Tue, 25 Dec 2007 21:49:14 CST

There is no abstract available for this page revision.

MUURMUURIS

kayd — Tue, 25 Dec 2007 21:04:17 CST

Waa gabay ku saabsan suugaanta iyo habkii loo adeegsan jirey xilligii

kacaanku jirey taas oo illaa maanta nin habkeeda maansada yaqaan iyo mid aan aqoon u lahayniba uu tiriyo iyada oo qalqalloocda, markaas suugaantii oo ayadu cabanaysa ayaannu gabaygan is weydaarsanay.

Suugaanta maad laga dhigtee maydka laga yeelay
Ayadoo madluuntaan arkoo murugo haysaaye
Miridhkaan la joogsaday warkay miimka ka caddaysay
Waxay tidhi madoobaadayeey ima maqlaysaane
Maankaa i doorsamay waxay maanso bidayaane
Nimankii i maamuli jiree magaca ii yeelay
Macnahayga way garanayeen marinadaydiiye
Way mala habaabeen kuwaa maanta ii hadhaye
Maalay la qooshiyo sidii mur iyo daybaaqda
Imikay maroor ugu gabyaan maaxda hadalkiiye
Yaa meeriskaygii qaribay ma hadho weeyaane?

Waxaan idhi maraaraha wakhtigu ways melmelayaaye
Waa maalin gelinkeed adduun meel la joogaba e
Waadigan magaabee tixyahay maatadii gabaye
Way mala awaalaan waxii mooyi aan idhiye
Macaash bay ka deyayaan waxaan meesha qabanayne
Mudanow ninkay leeyihiin mawle lagu sheegye
Immikay madhoodhada tirshaan miidha waaberiye
Hadday mawjadaa garanayaan maylka laga eego
Mataanaha kumuu kala jareen mu'alifkoodiiye
Miisaanku kama dheeliyeen maansadii gabaye
Miishaar afweyniyo hadduu mudac ku heeraayo
Oo ay maqiiqaay tahoo muruqu heesaayo
Miinada hadday kugu xidheen meel fog laga daaray
Maxaan anigu maarayn karaa waa matoor jabaye?

Waxay tidhi macooyaan ahaa mudanta reeraaye
Madadaaladaydaa dhallaan maandhe loo tirine
Mirta iyo cawyskii halkii laga madiixaayey
Maahmaahyahaygii halkii laysu marinaayey
Murtidaan lahaan jirey la guur muunaddii hore e
Miimiida heestiyo maxaa muranna ii keenay?

Waxaan idhi muftaaxii naxwaha maayad lagu tuurye
Miyigaad ku noolayd halkay maqashu daaqaysay
Magaalaaba loo rogey halkaad muuqa ku lahayd
Hablihii Magool iyo lahaa Maydhan iyo Saafi
Mullaaxdii galoolkiyo kuwii maadha guranaayey
Ee morohda soo diiri jirey meesha laga waaye
Milgo kuuma heestiyo kuwaan maansadood garane
Magaalada markii ay tageen maykal baa helaye
Muqdishiyo Hargeysaa tuweys laga maroojaaye
Waxa ay mirqaan moodayaan miicda gaalada e
Maamuus haddii aad lahayd maanta kaa dhimaye
Mooyaa haddii aad dhextaal mooska lagu tuuray
Miiraalihii da'ay hadday milantay suugaanti
Makeekiga ku noolow intuu muluc heesaayo

Waxay tidhi miskiin baad tahoo mooge waa adiye
Ma ogtahay miciin ima taraan magaca soomaale
Mudug iyo waan taaganahay maalla beeg dhabahe
Mufriskiyo waxaad ila tagtaan mawlac buuxsamaye
Masalooyinkaygaan la qorin meesha laga waaye
Weli waa miscirirtii halkay maxastu ii taalle
Midhiqdaan ku sii jiro haddaan marinka lay joogsan
Musku ima xareeyee kitaab mudan la ii yeelin
Muuqayga waan qarinayaa maqalku waa ceebe

Waxaan idhi mahoogtooy adaa mooggan xaajada e
Wax kastoo la maamuusi jirey madadki loo diidye
Miidaanka nimankii fadhiyey maraq ma diiraane
Adigana muraadkaagu waa maaxda ii qora e
Oo macallin ii yeela oo miiddu yay lumine
Mirqin kuuma jarayaan kuwaad moodday gacalkaaye
Waataa malluugtii baxdee meeray feleggiiye
Moorada ayaan dhawrayaa maalmo dabadoode
Maqaarkaa ku sii jiif intuu mayaygu hooraayo.

AAFO KU NAAX

kayd — Tue, 20 Nov 2007 16:06:41 CST

There is no abstract available for this page revision.

XAAL

kayd — Wed, 24 Oct 2007 17:02:07 CDT

Iyada oo la ogsoon yahay cilladda ay leedahay qabyaaladdu ayaa hadana waxa jirta in dadka soomaliyeed daafacaad ugu jiraan sidii qolo waliba u ahaan lahayd tan ugu sarraysa. Qof waliba isga oo aan dhaawaceedii weli ka bogsan ayaa hadana hadalhaynteeda iyo ku kaftenkeeda aad mooddaa in uu is leeyahay yaan lagaa badin, markaas aniga oo ka hadlaya arrintaa ayaan gabaygan tiriyey sannadka 2000.

Arrintaan xagaagaan ogaa xeebta kaga guurey
Ee xuufta goortaan ku tegey xaal i qaban waayey
Markaan soo xasuustaba qalbiga xagali daacayso
Arrintii xabsiga kii la dhigay xaawa ku abaaday
Xiniinyaha haddii aan la qaban xabadka loo seexshey
Arrintii xilaa layska dhacay xoogna lagu qaaday
Arrintii ninkii xoolalaa xubin la siinaayey
Ee xaynta kii daaji yidhi laga xabaadhaayey
Arrintii xuquuqdii dadnimo xeerna laga waayey
Arrintii xisaabtii qabriga xayga lagu keenay
Arrintii nimaan xaashi wadan xag u dhaqaaqaynin
Xayiraadda gaadiidku qabo xoog u socon waayey
Xamaamada la badhee dadkii xadhigle boobaayey
Arrintii dagaal lagu xarbiyey laysna xagnaayey
Arrintii kuwii xoogsi tegey carabna xaabaayey
Xilligay yimaddeen raggii maalka laga xoogey
Ee laga xisaabshee mid kale ku xaragoonaayey
Arrintii xumaantii jirtaba xamar la saaraayey
Ee kii xigaalada ahaa loo xilqarinaayey

Arrintii xil saar looga dhigay odayo loo xiiro
Oo xarunta lagu soo sasabo xaabna lagu sooro
Xilligaana taliyee qabiil xiiso jabiwaayey
Arrintii dayuurado xuf yidhi xiinka laga yaabay
Ee xooggu miiggii cuskaday xamar ka soo duulay
Xaraf lagu haleelee dadkii maydku xero beelay
Xawaalada la taagee naflii ciidda lagu xaadhay
Arrintii dhurwaa xidhin ka yimi xoolo deyiwaayey
Ku xareedshey dhaawaca siduu xoodka fadhanaayo
Arrintii ninkii xooglalaa xayle qabanaayey
Ee xaaska sii jooga yidhi xaynka muu qabanne
Xaska jiifsadee waayo badan xulad ku laalaayey
Arrintii xamaan gurashadii xabashi loo daatay
Xansheerkii ilmaa lagu xidhxidhay xididdo naafeeyey
Xaawaley haweeniyo halkii xaaji cararaayey
Ayaa xiiso loo wada hayaa laga xanaaqayne

Haddii aada xisleedoo dadnimo xeerin garanayso
Xadantada ku gaadhiyo darxumo weli xajiimooto
Xusul duubna meel dheer ku timi xiiqna hadal deysey
Xayraan la roorkaad ahayd xiniftankii ooydey
Xaglihii ku daaliyo lugaa xaydha marinaysey
Xummaddii qabiiladu lahayd xuubka sare beeshay
Adigoo xanbaaraday ku jabay xabadku naafoobay
Xamakow ku noolayd beryaa xabagna daaqaysey
Xabbaddii dhacaysiyo dagaal xuufta ledi weydey
Xiddigaa illaa sumal la qalo xag uma daymoonne
Waxaad xuladka naareed u shidi xanyo reer reerka
Ee aad xayaabada bakhtiday xaabo ugu tuuri
Xanbaboor adoon taag lahayn xumo ku doonayso
Xinni aad u leedee nin kale xadhig u qoolayso
La xanshaashaqaysee dadkii xeel la daba joogto
Ee xawlmargeedkaa ku tegey muran la xiiqayso
Xunbo daadinaysee dadkii xoorka ugu saydhin
Xarbi aad ku nooshahay illayn xaydanaad tahaye
Xabiib ruux ku moodiyo ninkii xeelli kula yaalla
Naftu ay xasaradee ku tidhi xaasid qoladiisa
Xalkii nabadda lagu doonayiyo xaradadii diiddo
Xaddi sheeganaysoo awood xuuxi tidho reero
Xundhur baa asaagaa dishoo xaaqday ubadkiiye
Adna xiira aad tidhi hambada xaaqa noloshooda
Xiddigtii daaraa adduun xaalku marayaaye
Anna aan xusuustii wakhtiga xa iyo miin sheego
Xanjo quud dhegaa ugu gufayn xarafna aad diiddo
Xilligii ku soo maray dhibtii xaaddu kici weydo
Xaashaa lillaahiye midnimo xeeri maad odhanne

Ma ogtahay xan iyo qoys la wada xaax ka maad odhane
Xagaagii la joogaba dagaal xaydanaad tahaye
Xoolana ma joogaan dhulkii xaaflufkaa galaye
Xididada dareenkee bakhtiyey xubinta naafowdey
Waa waxaad xishood uga tagteen xoorte sharaftiiye
Ee aad xifaalaha dad kale ugu xumaysaane
Adduunyada xuduudaa ku yaal xeerka qarameede
Xaydaanka qolo ruuxa degey maba xisaabshaane
Xigto waa kuwaa wada degtaan xaafaddaad tahaye

Xiid maha walaalkaa hadday xuunsho fadhanayso
Adigan xiniinyaa bery xuurtu kaa cuniye
Xar baa galay kuwaan garanayoo waa xolfoof madhane
Maxaan xarafka kaga daalayaa waa xashiish qubane.

SEBEN KULUL

kayd — Wed, 24 Oct 2007 16:57:46 CDT

There is no abstract available for this page revision.

DALMAR

kayd — Fri, 31 Aug 2007 13:40:22 CDT

There is no abstract available for this page revision.

MADAXWEYNE

kayd — Tue, 28 Aug 2007 22:22:13 CDT

Riix meesha cad

Maansadani waxay ka jawaabaysaa silsiladdii taxanaha ahayd ee ku saabsanayd madaxweynaha Somaliland magaceeduna ahaa Madaxweyne waa kuma?

Maansadu dareenkay
Maradhaamisaayoo
Halka maaxdu jiiftiyo
Maankay qoddaayoo
Waa muraayad waayaha
Lagu muujiyaayoo
Halka ay ku mudan tahay
Muruq baa ku joogoo
Maalay qadhaadh iyo
Mur haddhay ka daran tahay
Kama maagto teedoo
Maskaxdiyo halbawlaha
Marrinnada ka faafay
Makhsinnada ku leedoo
Maamkeedu yaallaa
Qofka mawjadeediyo
Mayaygeedu jiidhaa
Mir kacuu habeenkii
Ereyada maleegaa
Miinleey ka curiyaa
Halka ay ka midhiq tidhi
Ka hillaacday maantana
Bal aan muujo taan rabo
Erayadan miciinsado
Oon sheeko murugtiyo
Kala miiro taan qabo

Runta aan u meel dayo
Meherbay ku dhalataye
Maamuus u soo diro
Midigteeda hooyoo
Ha bedelin macnaha guud
Maryihii hiddaa iyo
Boqor bay ku marantaye
Milgadii ogsoonow
Mergi weeye hadalkuye
Muurmuuris kala dhawr

Madaxweyne waa kaa
Maatada kuwii jaray
Marta dumarka siibee
Maxstiina gawracay
Maaruqay carruurtii
Mindiyaha u qaadee
Mindiishii saraysiyo
Mudacayada xanbaaree
Maamulay dhankiisii

Madaxweyne waa kaa
Meydkuu ku joogsday
Weli muuqanaayee
Mililkii halkuu galay
Weli sii madawdahay
Dheecaan maleesamay
Daadkii habeen mary
Weli maydhin dhiiggii
Mitidkii dagaalamay
Ee macangaggii diray
Ka manquushay goobtii
Ee miino jiiftiyo
La kaceen masbaarradu
Maskab caawa loo tirin
Ee uu mar dhoofiyo
Nin maqnaa ku soo degey
Masalaha ka jiitee
Maareeya guud iyo
Magacii wasiir yahay
Moohaarka kii tumay
Mooyaana soo helay
Masaftuu ku shuba yidhi
Meel shisheeye kii tegey
Intuu mururuf soo yidhi
Ka maroojey tiisii
Wada miistay kelidii
Muran yahay xaqiisii

Madaxweyne waa kaa
Maamulkuu ahaan jirey
Maraagay garaaceen
Miishaarta lagu jaray
Magool saari waayee
Midhihiyo canbuushii
Morohdii la diirtiyo
Meygaagga jiifsaday
Muquusiikii abaar yahay
Mara boobtu doog tahay
Meel kale ha eegin
Isagaa markhaatiya
Oo maragga kuu furi

Madaxweyne waa kaa
Maqashiisa raacee
Mayraca habeenkii
Maaweelo joogta ah
Madadaalinaayee
Odayada mirqaankiyo
Ugu roon masruufkee
Maamuus qabiiliga
Mulaciyo abeeskiyo
Maska guda habeenkii
Kala moosa toodee
Isna mahadda leeyahay

Madaxweyne waa kaa
Mashaqada la nool yahay
Muruqmaal sadkii helin
Maalkiina uu baxay
Mareegtii la soohiyo
Madhan yahay duleedkii
Dadku wada mallaaliyo
Macal qabad u jeesteen
Masaariif ninkii hela
Marti badani joogtee
Maraq ay wadaagaan
Muruqiyo tagoogtiyo
Misigtii la kala jaro
Dadka kii madluunee
Midigtiisa waayana
Macaluusha uu qabo
Muska jiifsanaayee
Isna uu mushaaxee
Meel kale u duulee
Miciyaha samaystee
Ku mashquulay tiisii
Muudsaday wuxuu helo
U mashxaraddo taan ogey

Madaxweyne waa kaa
Maalkii dadweynaha
Iyadoon macaaash jirin
Mafris lagu fadhiistiyo
Murruq jaada mooyee
Macano yeelan waayee
Iyadooy madaw tahay
Maqan yahay ilayskii
Majaroor la dhaansado
Moodhikaarka guuxiyo
Kii socodka maagani
Haad wada maraanoo
Miiq yahay jidweynuhu
Marduufkii la feentiyo
Bacdu tahay malaayiin
Mulacyaysa suuqyada
Mijahiisa sudhan tahay
Maanaca habeen odhan
Midhiq yahay xashiishkii
Malko weyn ka buuxsamay.

SOOMAALI BAAN AHAY

kayd — Tue, 07 Aug 2007 15:07:56 CDT

Soomali baan ahay
Sabadaydu waa meel
Siman oo dagaal badan
Haddii aan socdaal tago
Anigoo sibraariyo
Solay jiidha qaato
Warankayga siibane
Ku sibaaqa xaydhoo
Senga fuula mooyee
Sahal looma mari karo
Sagal li'i ma nabadgalo

Laba surin ku kulantaa
Markii ay salaantiyo
Sideed tahay dhameeyaan
Su'aashoodu waa qolo
Ninba saamiguu yahay
Anigoo sansaankiyo
Sawraca tilmaantiyo
Saantayda oogada
Sifo aan wadaagoo
Sawir keliya leeyahay
Sixirkii qabiilkiyo
Sumadaydu waa qolo

Sinta ceerigaabiyo
Sabadii Kismaayood
Boorama salkeediyo
Surimada Nugaaleed
Inta saylac joogtaa
Sadarada quraankiyo
Suuradaa ilaahiyo
Salligay wadaagaan
Sina kuma heshiiyaan
Waan kuu sarreeyaa
Anigaa suldaanka leh
Oo kaa sarkaal badan
Hadallada silloonee
Sunta laga abuuraa
Sifa hayga weeyaan

Noloshaydu waa subax
Samadoo irmaanoo
Sidigtii lammaan tahay
caanii susumayaan
U salaaxo gaawaha
Iyo seben gu'yaadoo
Dhulka saac magooliyo
Siman tahay dareentii

Sahankaygu waa debed
Sacabada intaan furo
Sad shisheeye aan helo
Waxa laygu sooraa
Amma laysaxeexaa
Waa saanad qiiqdiyo
Sulub iyo rasaasiyo
Seef laba afleeyoo
Sebigiyo dhallaankiyo
Lagu dilo sokeeyaa

Dunidoo sodcaashoo
La salooshay meel dheer
Sahankii ku weeraray
Samadaa korkeennoo
Sayruukh la wada ganay
Oo sayniskii jiro
Waxaan ahay samaan hore
Sidii aan ahaayoo
Saabkii kamaan tegin
Salligii kamaan kicin
Saantaan goglanayaa

Dadka kii sarreeyee
Subax uun hogaanshaa
Sahal ugama soo dego
Sandulluu xukumayaa
Sunta qaybi waayaa
Intay sees wadaagaan
Safka way la joogaan
Ma saxaan dhibaatada
Sulaaq maamul baa jira
Sollon go'ay adduunyada

Dhulkaygii sanaaggii
Buuraha salkoodii
Goodir sararaweyniyo
Seenyada ugaadhii
Susumaysey deeradu
Sakaaradi ma joogtoo
Saxariir dhammaadoo
Sibiq xaalku weeyaan
Waa salalmadhlow orod
Seeraan ka dhigayaa

Subaxii la joogaba
Waxaan ahay sarmaaniyo
Nin shidaaya saaroo
Qudhacaan sarriigtaa
Solaygaan dubaayiyo
Soortaan ku kariyaa
Ma siraado shay kale
Sawsawlahaan gubay
Saacii ka bixi jirey
Sabeenuhu ma daaqaan
Waxaan ahay nin suuroo
Dibi dhalay saciisii
Ku siqaaya boodhoo
Samir kaygu waa abdid
Soomaali baan ahay…..

SUUGAANTA KAYD MAX'D CABDALLA - Recently Updated Pages

SUUGAANTII KAYD M.CABDALLA

OGEYSIIS

CARTA

IDIL

GABBALDAYE

DHIRBAAXO

QALALAASE

HORMO WADE

HAGOOGANE

RA'YIGA MARTIDA QOLKA SOO BOOQATAY

SILSILADDII GOLE JACAYL

OTHER LINKS

HEESAHA KAYD CURIYEY INTA AAN HAYNO

MUURMUURIS

AAFO KU NAAX

XAAL

SEBEN KULUL

DALMAR

MADAXWEYNE

SOOMAALI BAAN AHAY